ကချင်လယ်မြေ ယုဇနကုမ္ပဏီသိမ်းယူမှု အကြောင်းပြန်ကြားချက် မရ

ကချင်ပြည်နယ် ဖားကန့်မြို့နယ်က တောင်သူလယ်သမားတွေရဲ့မြေယာ အသိမ်းခံရတဲ့ ကိစ္စကို NDF အမျိုးသားဒီမိုကရေစီ အင်အားစု ပါတီဝင် ဒေါ်ဘောက်ဂျာက ဦးဆောင်ပြီး မနှစ်ကတည်းက တရားစွဲဆိုထားတာ အခုချိန်ထိ တစုံတရာ ဘာမှ အကြောင်းပြန်ကြားချက် မရရှိသေးဘူးလို့ ဒေသခံတွေက ပြောပါတယ်။

ဖားကန့်မြို့နယ် NLD အမျိုးသားဒီမိုကရေစီ အဖွဲ့ချုပ်ဝင် ဦးတာရှီလာဆိုင်းက
-

"နေပြည်တော်ကို တင်ထားတဲ့ လယ်ယာမြေ ကိစ္စလေ။ ၂၀၁၀ လောက်ကနေ စပြီး သူတို့ လုပ်နေတာ။ ပထမက သူတို့ တစ်ဧကကို ၈ သောင်းနှုန်း ပြောတယ်။ ဒါပေမဲ့ သူတို့ က သိမ်းထားတာ ၄ နှစ်ကြာသွားတာမို့ ဒီ ၄နှစ်တာ ကာလအတွက် နစ်နာကြေး လိုချင်တယ်ပေါ့။ နေပြည်တော်ကို ဦးတိုက်လျှောက်တဲ့အခါ ပြန်ပြီး ရှင်းတာ ဖြေကြားတာ မရှိဘူး။ ၄၅ ရက် ၆၀ ရက်မှာ အကြောင်းပြန်မယ်ပြောပြီး အခုအချိန်အထိ အကြောင်းမပြန်ဘူး။"

စိုက်ပျိုးရေးစီမံချက်တွေ အရ ဟူးကောင်းတောင်ကြားဒေသက
မြေယာတွေကို ၂၀၀၇ ခုနှစ်ကစပြီး ယုဇနကုမ္ပဏီက သိမ်းခဲ့ရာမှာ မိုးညှင်းနဲ့ ဖားကန့်က ဒေသခံ ၆၀၀ ကျော်ရဲ့ မြေဧက ၁၃၀၀ ကျော်လည်း ပါရှိပါတယ်။

ဒီအထဲက ဒေသခံ ၂၁၀ ကျော်ဟာ အုပ်စုသုံးစုခွဲပြီး ယုဇနကုမ္ပဏီကို ၂၀၁၁ ဇူလိုင်လမှာ စတင် တရားစွဲခဲ့တာပါ။

ဒေါ်ဘောက်ဂျာဟာ ဖားကန့်မြို့နယ် NDF ပါတီ ရဲ့ လွှတ်တော် ကိုယ်စားလှယ်လောင်းဖြစ်ပြီး ၂၀၁၀ ရွေးကောက်ပွဲမှာ ၀င်ရောက် ယှဉ်ပြိုင်ခဲ့ပေမဲ့ ကြံ့ခိုင်ဖွံ့ဖြိုးရေးပါတီ ကိုယ်စားလှယ် ဗိုလ်ချုပ်ဟောင်း ဦးအုန်းမြင့်ကို ရှုံးနိမ့်ခဲ့ပါတယ်။ ၂၀၁၂ ကြားဖြတ်ရွေးကောက်ပွဲမှာ
ဒေါ်ဘောက်ဂျာရော NLD ကနေ ဦးတာရှီလာဆိုင်းပါ ဖားကန့်
မြို့နယ်ကနေ ၀င်ရောက်ယှဉ်ပြိုင်ဖို့ စီစဉ်ထားပေမဲ့ နယ်မြေလုံခြုံရေး အကြောင်းပြချက်ကြောင့် ရွေးကောက်ပွဲ မ၀င်ခဲ့ရပါဘူး။

သတင်းထောက်-ကိုစည်သူ